جدو ربنا يهدو

والله العظيم دى حاجة تجنن ، أصل الموضوع زاد عن حده أوى نقلب فى الجرايد نلاقى الكلام عن قضية جدو ، نولع التلفزيون نلاقى الكلام برضه عن قضية جدو ، نفتح التلاجة نلاقى الجيلى والمهلبية بيحكوا فى موضوع جدو ، وياريت فيه كلمة واحدة فى الكلام ده كله تخص كرة القدم ، إنما الكلام كله عن التوقيع والإيقاف والعقوبة والغرامة ، كأننا بنتكلم عن واحد متهم ورد سجون مش لعيب كرة ، يعنى من ساعة ما بسلامته شرف من أنجولا ما سمعناش ولا كلمة واحدة عن أهداف جدو ولاعن إبداعات جدو ولا عن مهارات جدو ،والكلام كله عن القضية لما الواحد جاله العصبى ، وأنا رأيى عشان نخلص من الموضوع ده وعشان الدولة والشعب ينتبهوا لقضايانا المتلتلة ونسيبنا من العبط اللى إحنا فيه لازم الدولة تعمل قانون أن اللى يتكلم عن موضوع جدو تانى ياخد إيقاف ست شهور وغرامة ميت ألف جنيه وساعتها الناس مش حتقول غير جملة واحدة بس " اللى يجيب سيرة جدو ربنا يبتليه بنصيبة تهده " .