بعد أن أصبحت سيرة جدو على كل لسان ، إنطلق الصحفى الكبير ريحان يبحث عنه فى كل مكان ، ولما أعياه البحث وأصيب بالتوهان ، عاد يجر أذيال الخيبة والخذلان ، وجلس حزينا فى أحد  الأركان ، وأخرج قلمه الكستبان وألف هذا الحديث بالزور والبهتان وقدمه لنا لينشر بالمجان .
ريحان : بقولك إيه يا جدو ، عاوز أسألك كام سؤال بس تجاوبنى بصراحة وأوعدك إنى مش حجيب سيرة لحد .
جدو : ولا تجيب ، انا دلوقتى على ذمة الأهلى ، يعنى اللى يزعلنى تبقى أمه دعيا عليه.
ريحان : بصراحة كده إنت مضيت للزمالك قبل فترة الحماية ولابعدها ؟
جدو : بصراحة أنا لحد دلوقتى معرفش يعنى إيه فترة الحماية ، أنا معرفش غير فترة التوقف عشان بروح فيها البحر .
ريحان : طاب إنت مضيت بمحض إرادتك ولا همه أغروك .
جدو : بصراحة همه أغرونى إغراء جامد قوى ، ده أنا أول ما قابلتهم شربونى عصير منجة بالموز والفراولة والاناناس وانا كان كبيرى عصير القصب ، فدماغى لفت ومحستش غير وأنا ماضى .
ريحان : طاب إنت خدت منهم مليون ومتين ألف ولا لأ ؟
جدو : بالعقل كده لو أنا خدت منهم المبلغ ده كنت ح أوديه فين ، ده بيتنا ما يكفهومش .
ريحان : طاب إزاى جالك جرأة تمضى لتلت أندية فى سنة واحدة ، ومش أى أندية أهلى وزمالك وإتحاد ، يعنى تلت نصايب ؟
جدو : أنا فعلا مضيت لتلت أندية بس ما لعبتش لحد ، حتى فى الإتحاد كنت مقضيها معاهم همبكة .
ريحان : طاب بصراحة كده ، إنت شايف إنك تستاهل كل الضجة دى ، دى مصر كلها ملهاش شغلانة غيرك ؟
جدو : بصراحة أنا مستاهلش كل ده ، بس تقول إيه ماهو رزق الهبل على المجانين .
ريحان : طاب لو جالك عقد إحتراف خارجى حتسيب الأهلى وتوقع ولا حتعمل إيه ؟     
جدو : طبعا حوقع ، بس المرة دى مش حوقع على بياض ، حوقع على صفار .
ريحان : طاب لو إتحاد الكرة قرر إيقافك ح تعمل إيه ؟
جدو : مش ح أسمع كلامهم وح أقعد .
ريحان : طاب فى النهاية تحب تسمع أغنية إيه ؟
جدو : أغنية إنت أهلاوى ولا زملكاوى ، الإتنين حلوين ، الإتنين طعمين .